Легіянерская Прысяга
выказвае ваяўнічы дух у некалькіх словах, цяжкіх па сэнсе і багатых па
наступствах. Некаторыя фразы выгравіраваныя як на медалі. Трэба ўхапіць іх
прызначэнне.
Менавіта гэта з’яўляецца мэтай дадзенай працы,
прызначанай адначасова легіянерам, якія складуць гэтую прысягу перад сваімі
братамі-легіянерамі, калі ўступяць у Легіён, але таксама і тым, што ўжо доўгі
час працуюць у яго шэрагах. Я падзяліў гэты Каментар на дзевяць раздзелаў, якія
можна было б прачытваць і разважаць на працягу дзевяці чарговых дзён.
Няхай Легіянерская Прысяга
дапаможа нам верна адказаць на загад Настаўніка “несці Яго Евангелле ва ўсе
канцы свету”.
Заданне адначасова
немагчымае і настойлівае. Дзеля мужнасці перачытаем наступныя словы Падручніка:
“Наш Госпад, трэба заўважыць, не вымагае, каб
навярнуліся ўсе стварэнні, а толькі, каб мы прыйшлі да кожнага. Можа стацца,
што іх навяртанне па-за чалавечымі магчымасцямі, але заўсёды магчыма наблізіцца
да іх. Калі мы наладзім гэты кантакт, паўсюль і без выключэння, што тады
адбудзецца? Жніво абавязкова прыйдзе ў свой час. Бо Госпад не патрабуе крокаў,
што не маюць сэнсу і плёну. Але калі мы падбаем навязаць кантакт з усімі
людзьмі, Божы загад будзе здзейснены, а гэта галоўнае. І толькі Бог можа
дазволіць нам аднойчы прыняць удзел у новым Спасланні Духа Святога!”
Легіянерская прысяга
Дух Святы,
я (імя кандыдата),
Жадаючы сёння ўступіць у шэрагі
Легіёну Марыі,
Ведаючы таксама, што сам па сабе я не змагу годна
выконваць гэтае служэнне,
Малю Цябе сысці на мяне і напоўніць мяне Сабой,
Каб мая сціплая дзейнасць была падтрыманая Тваёй
моцай і сталася прыладай Тваіх усемагутных намераў.
Я таксама ведаю, што Ты, які прыйшоў адрадзіць свет
у Госпадзе нашым Езусе Хрысце,
Пажадаў зрабіць гэта толькі з удзелам Найчысцейшай
Дзевы Марыі;
Я ведаю, што без Яе мы не зможам ані пазнаць, ані
палюбіць Цябе,
Што менавіта праз Яе ўдзяляюцца дары, цноты і ласкі
тым, каму Яна хоча, столькі і так, як Яна пажадае;
І я бачу, што таямніца дасканалага служэння
легіянера —
У тым, каб цалкам з’яднацца з Той, што была
цалкам з’яднаная з Табой.
Таму, беручы ў рукі вэксілюм Легіёна, які
адлюстроўвае гэтыя праўды,
Я стаю перад Табой як Яе жаўнер і Яе дзіця
І абвяшчаю такім чынам маю поўную залежнасць ад Яе.
Яна — Маці маёй душы, Яе сэрца і маё — адзіныя;
І з глыбіні гэтага адзінага сэрца
Яна ізноў кажа, як раней: “Вось я, слуга Божая”;
І Ты ізноў прыходзіш, каб учыніць праз Яе вялікія
справы.
Няхай мяне пакрые Твая моц і ўвойдзе ў маю душу,
каб прынесці ў яе агонь і любоў.
Няхай мая душа будзе адным з любоўю Дзевы
Марыі і Яе воляй уратаваць свет;
Каб я стаўся чыстым у Той, каго Ты стварыў
Беззаганнай!
Каб праз Цябе ўва мне ўзрастаў наш Госпад Езус
Хрыстус;
Каб разам з Ёй, Яго Маці, я мог несці Яго свету і
людзям, якія Яго патрабуюць!
І каб пасля перамогі ўсе гэтыя душы і я сам маглі
вечна валадарыць з Ёй у хвале Найсвяцейшай Тройцы.
О Духу Святы, упэўнены ў тым, што Ты мяне прымеш і
паслужышся мной, што Ты пераменіш сёння маю слабасць у моц,
Я займаю месца ў шэрагах Легіёна і асмельваюся
абяцаць верную службу.
Я абяцаю захоўваць дысцыпліну, якая яднае мяне з
братамі-легіянерамі,
Робіць нас войскам і накіроўвае нашыя шэрагі ў руху
наперад разам з Марыяй,
Каб выканаць Тваю волю, каб аб’явіць цуды Тваёй
Ласкі,
Якія адновяць аблічча зямлі і ўстановяць, о
Найсвяцейшы Духу, Тваё панаванне над усім.
У імя Айца, і Сына, і Святога Духа. Амэн.
